MAKALA: LUIS VAN GAAL NA MIFUMO YA 2-3-2-3, 4-3-3 DHIDI YA 4-4-2

RIVALDO alifanikiwa kushinda Tuzo ya Mchezaji Bora wa Ulaya, mara tu baada ya mafanikio hayo akaamua kuanika hisia zake na kumwambia kocha wake kwamba hatacheza tena upande wa kushoto, yaani winga. Badala yake anataka kucheza namba kumi.

Kocha wake katika kikosi cha Barcelona wakati huo akamuambia sawa, wakati unachukua tuzo ya mchezaji bora ulikuwa unacheza kama winga wa kushoto, sasa umevimba kichwa, utakula jeuri yako. Rivaldo akaanza kusota benchi, hadi aliposalimu amri na kukubali kucheza winga ya kushoto.

Kocha huyo alikuwa ni Luis van Gaal, bosi mpya wa Manchester United ambaye anaaminika anafanana na Alex Ferguson kiutendaji na hasa namna ya kufanya kazi na mastaa wakubwa.

Van Gaal aliyekuwa Kocha Bora wa Dunia mwaka 1995 si mtu wa kubabaika, anaijua kazi yake, pia ni mwenye msimamo wa anachotaka, lakini anavutiwa kuwa na urafiki na wachezaji wake.

Kikubwa ambacho wengi wanataka kujua ni kuhusu nini atakifanya kuibadilisha Manchester United ambayo ni mfupa uliomshinda David Moyes baada ya Ferguson ‘kuula’ kwa raha zake, tena kwa ulaiini.

Kushindwa hakitakuwa kitu rahisi kwa maana ya rekodi, maana van Gaal ameshinda karibu mataji yote, ukianza na ubingwa wa Uholanzi akiwa na Ajax, ule wa La Liga akiwa na Barcelona, pia bingwa wa Bundesliga akiwa na Bayern Munich.

Usisahau Kombe la Washindi Ulaya na Ligi ya Mabingwa Ulaya, hivyo hana ugeni hata kidogo na makombe, ingawa si ‘garantii’ kwamba kupitia rekodi zake leo ndiyo atashinda tena.

Kinachowaumiza kichwa wengi ni mfumo, kawaida van Gaal ‘anaabudu’ ule wa 4-3-3 ambao utakuwa ni mpya na mgumu kwa wachezaji wa Manchester United.

Hata sasa akiwa na kikosi cha timu ya taifa ya Uholanzi, van Gaal amekuwa akiutumia zaidi mfumo huo kama namna moja kwake, lakini ana tabia nyingine ya kujaribu mifumo.

Kawaida van Gaal anasema anataka kutumia mfumo kutokana na wachezaji. Kwa Manchester United, 4-4-2 umekuwa ndiyo mfumo mama, lakini kwake ni nadra, huenda akaujaribu pia.

Lakini amekuwa akitumia mifumo mingine na kuwashangaza wengi, mfano wakati akiwa na Barcelona, amewahi kutumia mfumo wa 2-3-2-3.

Manchester United wataweza mfumo huo?

Atawatumia akina nani na ukizingatia safu ya ulinzi imeporomoka na kwa mfumo wake lazima awe na wachezaji wakongwe?

Hana namba sita wa uhakika, Michael Carrick ataingia kwenye mfumo wake? Akiwa Barcelona aliwatumia zaidi wachezaji wake wakati huo Pep Guardiola na Puyol kwenye ukabaji, anahitaji wachezaji wa namna hiyo.

Ili kuingiza mifumo anayotaka, van Gaal analazimika kufanya usajili hasa kwenye kiungo ambako Kroos kutoka Bayern anamfaa, lakini beki mkongwe angalau mmoja wa kusaidiana na Chris Smalling, John Evans na Phil Jones.